Интернет мәселесіне байланысты шағымдар көп. Ауылды былай қойғанда, қаладағы интернет сапасы мәз емес. Өткен жылдың өзінде 21 мың шағым келіп түскен. Ал биыл 5 айдың өзінде 11 мыңға жуық тұрғын шағымданып үлгерген. Үкімет отырысында осылай деген премьер – министр Олжас Бектенов мәселені жедел шешуді тапсырды. Себебі сапалы байланыспен қамтамасыз ету мәселесі – стратегиялық маңызы бар міндет. Оны шешу үшін өткен жылы «Қолжетімді интернет» ұлттық жобасы қабылданған. Енді осыны уақтылы іске асыру – Цифрлық даму министрлігінің міндеті. Сондай-ақ Үкімет басшысы республикалық және негізгі облыстық жолдарда сапалы ұялы байланыс пен мобильді интернет болуы тиіс екенін баса айтты.