19 наурыз күні сайлаушылар 5 түсті бюллетень арқылы дауыс береді. Бұл туралы Орталық сайлау комиссиясы мәлімдеді. Мәжіліс депутаттарына дауыс беру үшін: көк түсті бюллетень – партиялық тізім бойынша, жасыл түсті бюллетень бір партиялық сайлау округтары бойынша. Тағы үш бюллетень күлгін, қызылсары және сұр – бұл мәслихат депутаттарының сайлауы үшін қолданылады. Сондай-ақ, Мәжіліс сайлауында дауыс беру бюллетенінің көлемі де өзгертіледі.Нұрлан ӘБДІРОВ, ҚР ОРТАЛЫҚ САЙЛАУ КОМИССИЯСЫНЫҢ ТӨРАҒАСЫ: Біз бюллетеньдердің көлемін өзгертеміз. Ол үшін тәжірибе жасап көрдік. Егер әдеттегі А4 емес А 5 қағазын қолданатын болсақ, онда бюллетень жақсы оқылады. Бюллетеньде партиялар тізіміне арналған 7 жолақ болады. Ал 8-і позиция барлық кандидатқа қарсы дауыс беру жолағы. Егер бір мандатты округтерге келсек, 16 кандидаттың аты-жөні еркін сияды және көзге көрінеді. Көру қабілеті нашар адамдар үшін сайлау учаскелерінде арнайы орындар жабдықталады. Егер депутаттыққа кандидаттардың саны 16-дан астам болса, онда бюллетеньнің мөлшері ұлғая түседі. Ал саяси партиялардың пікірсайысы 16 наурызда өтеді. Бүгіннен бастап ТМД байқаушылар миссиясы Астанада жұмысын бастайды. ТМД өкілінің айтуынша, миссия жұмысы барысында саяси партиялардың сайлауалды штабтарымен, депутаттыққа кандидаттармен бірнеше кездесу өткізіп, барлық деңгейдегі сайлау учаскесінің жұмысымен танысуы жоспарланған. Леонид АНФИМОВ, ТМД БАС ХАТШЫСЫНЫҢ БІРІНШІ ОРЫНБАСАРЫ: ТМД байқаушылары миссиясы сайлауға дайындық пен оны өткізу мониторингіне кірісті. Бұл біздің Қазақстандағы парламенттік және президенттік сайлаулардағы 17-ші, ал ТМД бойынша 120-шы миссиямыз екенін атап өткім келеді. Байқаушылардың негізгі тобы дауыс беруге 2-3 күн қалғанда, яғни 16-17 наурызда Астанаға келеді деп күтіледі. Жалпы біз тек Астанада ғана емес, сонымен бірге елдің өзге де өңірлерінде дауыс беру процесін байқайтын боламыз.