Соңғы үш жылда қант өндірісіне субсидия артқанымен, өндірілген өнім көлемі көбеймеген. Керісінше, импортқа тәуелділігіміз артқан. Бұл туралы Мәжілістегі Үкімет сағатында Аграрлық мәселелер комитетінің төрағасы, депутат Серік Егізбаев айтты. Ол қант бойынша жағдай өте күрделі деді. Дайын өнімнен де, шикізаттан да шет елге тәуелділік бар. Ал фермерлер жұмыс істегісі келсе де, «Агробизнес» бағдарламасы бойынша несие алу мұңға айналған. Сондықтан саладағы мәселелерді шешу үшін депутат шаруаларға несие беру шарттарын, оның ішінде кепілмен қамтамасыз ету талаптарын түбегейлі қайта қарау қажет деп есептейді.Серік ЕГІЗБАЕВ, ҚР ПАРЛАМЕНТІ МӘЖІЛІСІНІҢ ДЕПУТАТЫ: Министрлік басшылығы соңғы 2 жарым жылда субсидия беруге қатысты бұйрықтар 20-дан көп рет өзгертілген! No comment! Субсидия беру жөніндегі мемлекеттік саясат әрбір жарты жыл сайын өзгеретін болса, фермерлер өз жұмысын қалай жоспарлауы керек? Министрлікке субсидия берудің тұрақты және түсінікті ережелерін белгілеу және оны кемінде 5 жылға дейін өзгертпеу қажет. Депутаттар сондай-ақ, аграрлық банк құру мәселесі жыл сайын көтеріліп жүргенімен, неге қолдау таппай жатқанын сұрады. Ербол Қарашөкеевтің айтуынша, ауыл шаруашылығы министрлігі бұл бастаманы қолдап отыр. Тек ведомствоаралық комиссия қолдамай отырған көрінеді. Ербол ҚАРАШӨКЕЕВ, ҚР АУЫЛ ШАРУАШЫЛЫҒЫ МИНИСТРІ: Негізі агроөнеркәсіптік банкті құру жай банк құру, банк үшін емес, құрған күннің өзінде несиелердің мерзімін ұзарту, сыйақы мөлшерлемесін төмендету мәселесін шешу керек. Жай банк құрып емес, проценттік төлемақысы төмендетіп, 12-15 жылға дейін беретіндей мүмкіндік жасау керек.