20 желтоқсанда Абай алаңында биіктігі 20 метр болатын бас шыршаның шамы жағылды. Салтанатты шараға Аяз ата мен Ақшақар қатысты.Жаңа жылға санаулы күндер қалды. Күні кеше Алматыда жүздеген жарық конструкциясы, жарқыраған гирлянда, жарық иллюминацияларымен безендірілген бас шырша орнатылған, ал бүгін, 20 желтоқсанда оның шамы жағылды.Бас шыршаның шамын алматылықтармен бірге Аяз ата мен Ақшақар жақты, ал мультфильм кейіпкерлері мен эстрада жұлдыздары мерекелік көңіл-күй сыйлады. Жаңа жыл алдындағы мерекелік шарада отандық эстрада жұлдыздары - Роза Рымбаева, Мәдина Сәдуақасова, Әли Оқапов, Мәди Рымбаев, "Жігіттер", "Кешью", "Ринго", "Шамис" және т. б. топтар өнер көрсетті.Жаңажылдық шыршалар әр ауданның негізгі алаңдарында орнатылған: Алмалы ауданы – "Астана" алаңы, Абай атындағы ҚазҰТЗУ алдындағы алаң, Алатау ауданы – "Алматы Арена" мұз айдыны алдындағы алаң, Әуезов ауданы-Н. Сац атындағы жасөспірімдер театры алдындағы алаң, Бостандық ауданы – Тұңғыш Президент атындағы саябақ, Балуан Шолақ атындағы спорт сарайы, Жетісу ауданы – Серіков көшесі, 2а, Медеу ауданы – "Халық арена" МС алдындағы алаң, "Медеу" биік таулы спорт кешені, Түрксіб ауданы – Сейфуллин даңғылы бойындағы №6 оқушылар үйі, Наурызбай ауданы – Шұғыла ш/а, 347. Сондай -ақ қаланың қоғамдық кеңістігі, жаяу жүргіншілер көшелері-Панфилов, Жібек жолы, магистральдық көшелер: Сәтбаев көшесі, Төле би көшесі, Майлин көшесі, Назарбаев даңғылы, Әл-Фараби даңғылы, Абылай хан даңғылы және т. б. жарық композицияларының бірыңғай стилінде безендірілген.31 желтоқсанда - Жаңа жыл қарсаңында "Астана" алаңында қазақстандық эстрада жұлдыздарының қатысуымен концерт өткізу жоспарланып отыр, оның соңы мерекелік отшашуға ұласады.