Алматыда да «Батыр» Президенттік полкінің әскерилері салтанатты түрде ту көтерді. Әнұранды жұрт жаппай шырқап, елдігіміздің нышандары дәріптелді. Патриоттық іс-шара "Медеу" биік таулы спорт кешенінде өтті. Биіктігі 40 метр болатын бағанға ені 7, ұзындығы 14 метрлік көкбайрақ көтерілді. Салтанатты іс-шараға мәдениет, спорт және қоғам қайраткерлерімен қатар Қазақстан халқы ассамблеясы мен жастар ұйымдарының өкілдері қатысты. Бейбіт ҚҰСАЙЫНОВ, ҚАЛАЛЫҚ МӘСЛИХАТ ДЕПУТАТЫ:Енді әр, кез келген елді тудан таниды ғой. Сондықтан біз үшін бұл іс - шара, бұл мереке өте үлкен, өте маңызды деп ойлаймын. Мемлекетіміздің мерейін асыратын мереке күні іс - шараға барлығы 1000-нан аса адам қатысты. Оның ішінде әлемде ел намысын қорғап жүрген спортшы, Олимпиада чемпионы Дмитрий Баландин де бар. Дмитрий БАЛАНДИН, ЖҮЗУДЕН ОЛИМПИАДА ЧЕМПИОНЫ:Барша қазақстандықтарды Рәміздер күнімен құттықтаймын. Әрбір азаматтың жүрегінде патриоттық сезімдерін қалыптастыруда мемлекеттік рәміздердің маңызы зор. Біздің мемлекеттік рәміздеріміз өте ерекше, әрі әдемі. Елтаңба, Ту мен Гимн – еліміздің тарихынан сыр шертетін, халқымыздың рухын, ұлттық салт-санасын, қаһармандығы мен даналығын, болашаққа үмітін, арман-тілегін жеткізетін ерекше құнды белгілер, тәуелсіз мемлекеттің басты символдары. Бағдарлама соңы мерекелік концертке ұласты. Жастар рәміздер күнімен бір-бірін құттықтап, керемет көңіл күймен тарқасты.