Маңғыстау облысында қатерлі ісікпен ауыратын науқас балалардың әлеуметтік мәселесі шешілмей тұр. Ата-аналар бүлдіршіндерді Алматы, Астанаға химиялық терапияға апару үшін, жол ақысын төлеуді сұрайды, - деп хабарлайды Massaget.kz тілшісі.Қатерлі дертке шалдыққан балалардың ата-аналары перзенттерін республикалық орталықтарға емге апаруға мәжбүр. Көп жағдайда науқас баланы пойызбен алып жүру мүмкін емес. Сондықтан олар ұшақпен барады. "Химиялық терепия деген курспен жүреді ғой. Араға 10 күн демалыс салып, брнеше рет шақырады. Ақтау мен Алматының арасын білесіздер қашық, билет қымбат. 100 мың теңгеден асады. Әрі уақыт тақалғанда алуға тура келеді. Біз міне 5 рет алып келдік. Химия алдық, ота жасаттық. Соңғы билетті несиеге алдым. Енді келесі билетті ойлап отырмын", - дейді Ақтаулық тұрғын Нұргүл Мұхантаева.Ақтаулық Нұргүл Мұхантаеваның 3 жасар қызы қатерлі дертке шалдыққан. Бүлдіршіннің бауырында 3-дәрежелі ісік бар. Тамыз айынан бері анасы қызын Алматы қаласына 5 рет апарып келді. Соның барлығында ол екеуінің ұшақ билеттерін бірін қарызданып, бірін несиеге алған.Жаңаөзен қаласының тұрғыны Гүлзира Ізбасова да науқас баласын Алматы қаласында емдетіп жүр. Оның айтуынша, жол ақысы төленбейді. Баланың емі үшін, қарызданып-қауғаланып, арасында ағайын-туыстың көмегімен баруға тура келуде. Әлі неше рет баратыны белгісіз. Сондықтан ол да жол ақысын төлеуді сұрайды."Бізге ешқандай жол ақысы ештеңе төленбейді. Біз жол ақыға ақша табу үшін өте қиын жағдайда боламыз. Неше рет қатынайтынымызды біз білмейміз. Өйткені аяқ астынан шақырады. Өйткені бұл Ақтау қаласында емделмейді. Сол үшін біз Алматы қаласында ем алып жатырмыз", - дейді Гүлзира Ізбасова.Маңғыстау облыстық денсаулық сақтау басқармасы басшылығының айтуынша, бұл науқастардың жол жүру ақысы Денсаулық Кодексіне сәйкес төленбейді. "Осыдан 2 жыл бұрын мамандандырылған медициналық көмекке төленетін. Мамандандырылған медициналық көмекке -қатерлі ісікті емдеу, ота жасау, химия терепия, радиология бағыттары жатады. Алайда, кейін бұл Денсаулық Кодексінен алынып тасталды. Сондықтан қазір төленбейді. Біз бұйрыққа сәйкес, тек жоғары технологиялық медициналық көмекке мұқтаж науқастардың бару-келу жолын төлеп отырмыз", - дейді облыстық денсаулық сақтау басқармасы басшысының орынбасары Асқар МахмутовДегенмен, басқарма басшылығы мамандандырылған медициналық көмекті Кодекске қайта енгізуді сұрап, министрлікке хат жолдауға уәде берді. Бұйрық келсе, жергілікті бюджет есебінен төлеудің жолдары қарастырылмақ. Айта кетейік, аймақта қатерлі дертке шалдыққан балалар көбеюде. Ай сайын 1 науқас бала тіркеледі. Қазір ауыр дертке шалдыққан - 180 бүлдіршін бар.
Ай сайын 1 бала: Маңғыстауда қатерлі ісікке шалдыққан балалар көбейіп бара жатыр
Жаңалықтар
