Балық шаруашылығы комитетінің бұрынғы төрағасы мен оның қарамағындағылар 6 жылға сотталды. Олар 2021 жылдан бері шағын және орта бизнес өкілдерінен жүйелі түрде пара алып келген. Бұл туралы Сыбайлас жемқорлыққа қарсы іс-қимыл агенттігінің ресми өкілі Данияр Бегайдаров мәлімдеді. Сондай-ақ Петропавл қаласындағы жеке серіктестік басшысы тұрғын үйлерді жылыту және сумен жабдықтауға бөлінген 7 жарым млн теңге бюджет қаражатын жымқырған. Қазір агенттік білім беру саласындағы жемқорлық фактілерінің жолын кесу бойынша жұмысты жалғастыруда. Данияр БЕГАЙДАРОВ, ҚР СЫБАЙЛАС ЖЕМҚОРЛЫҚҚА ҚАРСЫ ІС-ҚИМЫЛ АГЕНТТІГІНІҢ РЕСМИ ӨКІЛІ:2023 жылдың басынан бері осы салада барлығы 229 қылмыстық іс тіркелген. Олар бойынша шығын 15,1 млрд теңгені құрады. Жымқырудың ең көп сомасы Жетісу, Түркістан, Қызылорда, Алматы, Ақтөбе облыстарында және Алматы қаласында анықталды. Қылмыс жасауда 317 адам әшкереленді.