Байқоңыр қаласында тұратын 4 мыңға жуық қазақстандық сапалы медициналық қызмет ала алмай жүр. Сенатор Ақмарал Әлназарова Премьер-Министрге депутаттық сауал жолдады. Оның айтуынша, еліміздің азаматтары Ресей заңнамасының ережелері бойынша, оның ішінде 1996 жылғы үкіметаралық келісімге сәйкес зейнетақы алады. Міндетті әлеуметтік медициналық сақтандыру қорына жарналары мемлекет тарапынан төленсе де, тегін ем-дом ала алмай жүр. Себебі, олар туралы деректер Еңбек министрлігінің ақпараттық базасында жоқ. Байқоңыр қаласында, Төретам және Ақай ауылы тұрғындары үшін қазақстандық аурухана бар. Бірақ дәрігерлер қажетті көлемде тегін медициналық қызметтерді көрсетпей отыр дейді депутат.Ақмарал ӘЛНАЗАРОВА, ҚР ПАРЛАМЕНТІ СЕНАТЫНЫҢ ДЕПУТАТЫ: 22 жылы 2 мыңнан астам науқас консультациялық-диагностикалық көмек, 600-ге жуық науқас жоспарлы стационарлық көмек, оның ішінде коронарографиялық және офтальмохирургия көмегін алмаған. Осылайша Ресей федерациясы тарапынан зейнетақы төлемдерін алатын Қазақстан Республикасының азаматтарына медициналық қызмет көрсетуге қол жетімсіздігі қалыптасып, зейнеткерлер тегін медициналық көмек алу құқығынан айырылуда.