Германия парламентінің алдына 150 мың адам оңшылдарға наразылық білдіру үшін жиналды. Бұл туралы Euronews-ке сілтеме жасап KAZINFORM жазды.Демократияны қолдайтын манифестациялар үш апта бұрын басталған. Оған оңшыл экстремистердің жақында миллиондаған иммигранттарды, соның ішінде неміс азаматтығын алғандарды депортациялау мәселесін талқылаған Correctiv зерттеуші журналистер тобының мақаласы себеп болды. Кездесуге оңшыл «Германия үшін балама» (AfD) партиясының кейбір мүшелері қатысты. Берлиндегі жаңбырлы күн райына қарамастан, наразылық акциясына ұйымдастырушылар күткеннен көп адам жиналды. Полицияның мәліметінше, акцияға 150 мыңға жуық адам қатысты. Тым оңшылдарға қарсы осындай наразылық шаралары Германияның басқа қалаларында, соның ішінде оңтүстік Фрайбург пен батыстағы Ганноверде өтті. «Біз - брандмауэрміз» ұранымен жүрген наразылық білдірушілер Бундестаг жанындағы кеңістікті плакаттар, жалаулар мен қолшатырлар алаңына айналдырды. Сенбі күнгі наразылық шарасына Германияның түкпір-түкпірінен адамдар жиналып, нәсілшілдіктен бас тартатындарын көрсетіп, тарихтың қайталанбауын қалайтынын ескертті. «Біз 1930 жылы немесе тіпті 1920 жылдары бастан өткерген оқиғалардың қайталануына мүлдем жол бермеуіміз керек... Мұны болдырмау үшін қолдан келгеннің бәрін жасауымыз керек. Мен сол үшін осында жүрмін», - деді батыстағы порттық Бремен қаласынан келген Йонас Шмидт. AfD еуроскептикалық партия ретінде 2013 жылы құрылды және алғаш рет 2017 жылы Бундестагқа өтті. Статистика бұған дейін партияны халықтың 20%-ы қолдауымен елде екінші орында тұрғанын көрсетті, бұл 2021 жылғы соңғы федералды сайлауда алған 10,3% дауыстан әлдеқайда жоғары. Сонымен бірге сейсенбіде жүргізілген азаматтардың сауалнамасы 2023 жылдың шілдесінен бері алғаш рет AFD үлесі 20% -дан төмендегенін көрсетті. Сауалнама AfD Германияның шығысындағы, соның ішінде күзде сайлау өтуі тиіс Бранденбург, Саксония және Тюрингия жерлерінде жетекші партия екенін көрсетті.
Жаңалықтар
