Елімізде биыл 140 мыңға жуық тұрғын үй пайдалануға берілді. Осынша отбасы жаңа баспанада қоныс тойын тойлады. Мемлекет басшысының сайлауалды бағдарламасында тұрғындарды үймен қамтамасыз ету және тұрғын үй-коммуналдық шаруашылық жүйесін кешенді жаңғырту бағыты бойынша нақты міндеттер белгіленді. 7 жыл ішінде 111 млн шаршы метр тұрғын үй салу, үлескерлердің қатысуымен салынып жатқан проблемалық үйлердің барлығының құрылысын аяқтау, 40 мыңға жуық апатты және тозығы жеткен тұрғын үй иелерін жаңа баспанамен қамтамасыз ету, жаппай тұрғын үй құрылысы жүріп жатқан аудандарда инженерлік коммуникациялар жүргізу жұмыстарын жандандыру, елді мекендердің 100 пайызын сумен жабдықтау, жылумен және сумен жабдықтау, су тарту желілерінің тозу көрсеткішін 40 пайызға дейін төмендету жоспарланған.Биыл елімізде 15 млн шаршы метрден астам жаңа тұрғын үй пайдалануға берілді. 140 мыңға жуық отбасы жаңа баспанаға қол жеткізді. Бұл өткен жылмен салыстырғанда 16 пайызға артық. Жалпы республикада 134 мың тұрғын үй пайдалануға берілсе, оның 32 мыңнан астамы – жеке тұрғын үй. Сондай-ақ құрылыс жұмыстарының көлемі 5,9 трлн теңгеге жетті. Бұл өткен жылмен салыстырғанда 12,6 пайызға артық. 73 млрд теңгеге 41 жоба іске қосылды. Құрылыс материалдарын өндіру 1 трлн теңге. Елде 560 мың шақырым жылу, 1,7 мың шақырым сумен жабдықтау, су тарту желілері жөнделді. Сонымен қатар 2027 жылға дейін жол картасы бекітілді. Құрылыс индустрия саласында 270 жобаға 1,8 трлн теңге қаржы қарастырылған.