БҚО-да үш күнде 13 қылмыс жасаған екі жігіт құрықталды. Орал қаласы ПБ Шаған полиция бөлімінің қызметкерлері 15-18 қаңтар аралығында, яғни, осы үш тәулікте 13 қылмыс жасаған 2003, 2004 жылғы күдіктілерді құрықтады. Олар оңай олжа табуды көздеп, қала аумағындағы барлық ықшам аудандарда болып, автокөліктерден аккумулятор мен автомагнитолла, өзге де көлік иесіне тиесілі жеке заттарды ұрлаған. Мәселен, 15 қаңтар күні түнгі сағат 23:00-де белгісіз 3 тұлға Зачаганск ықшам ауданындағы жер үйдің ауласында тұрған Audi автокөлігінің салонына еркін түрде кіріп, аккумулятор мен 10 литрлік темір канистр ұрлаған. Ал, 16 қаңтарда Зачаганск ықшам ауданындағы жер үйдің ауласында тұрған ВАЗ 2107 автокөлігіне еркін кіріп, магнитофон, аккумулятор, 2 дана дыбыс зорайтқыш, артық дөңгелек сынды бұйымдарды үптеп кеткен. Шаған полиция бөлімінің сақшылары күдікті деген тұлғаларды құрықтады. Үш күнде 13 ұрлық дерегіне қатысы бар күдіктілер ұрлық жасағандарын толық мойындады. Олардан ұрлаған барлық жеке мүліктер түгелдей тәркіленді. Осы қылмыстық істі тергеу барысында күдіктілердің есепке алынбағаны, бұған дейін қылмыстық жауапкершілікке тартылмағаны анықталды.
Жаңалықтар
