Елорданың іргесіндегі Ыбырай Алтынсарин ауылының азаматтары Өркениеттен аулақта қалғандарына наразы. Тұрғындар су, жол, жарық және газ мәселесі әлі күнге толық шешімін таппай келеді дейді. Бюджеттен бөлінетін қаржы аз емес, алайда істің көбі аяғына жетпеген. “Бос уәдеден мезі болдық” деген тұрғындар біздің арнамызға шағымданды. Қазақтың тұңғыш ағартушысы Ыбырайдың есіміндегі ауыл тұрғындары инфрақұрылымдық ағартудың машақатын толық көре алмай отыр. 2021 жылы су тазарту құралдарын қалыпқа келтіруге бюджеттен 404 млн теңге бөлінсе де, халық "суды ішкен адам түгіл, техниканың өзі бүлініп қалады" дейді. Сөйте тұра ай сайын ауыз суға ақша төлеп, алайда таза суды қаладан әкелуге мәжбүр.Ольга ВАСИЛЬЧИКОВА, АУЫЛ ТҰРҒЫНЫ:Осы жылдың наурыз айында “Астана су арнасынан” мамандарды өзіміз шақыртып, сараптама жасаттық. Нәтижесіне қарасаңыздар судың жалпы кермектілігі нормадан 3 жарым есеге асып кетті. Сонымен қатар судағы сульфат, хлорид, натрий мен марганецтің деңгейі де тым жоғары. Бұл денсаулық үшін өте зиян. Тұрғындардың сөзінше, осы көктемде кей көшеге жол толық салынуы керек болған. Бірақ жолдың рахатын емес, қар суының азабын тарттық дейді. Соның салдарынан жедел жәрдем, өрт сөндіру көліктері керек жерге жете алмайды. Нұржан АРҒЫНБАЕВ, АУЫЛ ТҰРҒЫНЫ:Одан кейін газ тартты. Газ тартқан кезде үйге жақын қойған. Трактор кіріп-шығып, қар алуға мүмкіндік болмады. Соныменен бізді су басты. Мына көше тола су басты. Кісілер қар шығара алмаған соң оларлың да дворын су басты, погреві толды, дворы толды. Өкіметтен ешқандай көмек болған жоқ. Сондай-ақ таяуда ойын алаңдары салынған. Бірақ, сапасы сын көтермейді. Басы басталып, аяқсыз тұр. Түйінін таппаған мәселе бұл ғана емес. Ауылда жарық жоқ, үй іргесіндегі газ есіктен кірмеген, тіпті тұрғындар қоқысты жинап, шығарып қойсақ, айлап жатады дейді. Талғат РЫСБАЙҰЛЫ, АУЫЛ ТҰРҒЫНЫ:Бәрі жартылай-жартылай жұмыс. Осының бәрін акиматтан сұрасақ акимат жауап бере алмайды. Бізді тек ертең-ертең деп жылдың соңына қалдыра береді. Талапкер ауылдық округіндегілер "қаражат нақты мақсатқа жұмсалды, енді істі аяғына жеткізу үшін бөлінетін бюджетті күтіп отырмыз" дейді. Себебі су тасқынына байланысты бюджет қысқарған. Ғомар НАҚЫПОВ, ТАЛАПКЕР АУЫЛДЫҚ ОКРУГІ ӘКІМІНІҢ ОРЫНБАСАРЫ:Биыл облыстық бюджеттен 50 млн теңге бөлінді. Мердігер шыққаннан кейін осы бір айдың ішінде тазарту құрылғыларының бүкіл жүйесін жүргізеді. Сомен бұл мәселе шешіледі деп ойлап отырмыз. Екі кезеңге бөлінеді ғой жол құрылыстары. Бірінші кезеңде бүкілін бітіру мүмкін емес. Бітіре алмайды да оны. Биыл бізде Республикалық бюджеттен 152 млн жоспарланып отыр. Жаз мезгілінде ауыл көше жолдарын жарықтандыру мәселесі шешіледі. Ел болам десең бесігіңді түзе демей ме... Ал ауыл - алтын бесік. Осы тұста ауыл тұрғындары бас қаланың дәл сол иығында отырған соң жарық, су, жол болса деген арманымыз орындалмай қалмаса екен дейді.
Жаңалықтар
