Грекияда жолаушылар мен жүк пойызының соқтығысуы салдарынан кемінде 26 адам қаза тауып, 85 адам жараланды.Шетелдіа ақпарат агенттіктерінің хабарлауынша, елдің құтқару қызметі сәрсенбіге, яғни 1 наурызға қараған түні екі пойыз соқтығысып, кем дегенде 26 адам қаза тауып, тағы 85 адам жарақат алғанын мәлімдеген. ERT NEWS жаңалықтар арнасының эфирінде өртке қарсы қызмет өкілі Василис Ватракояннис Афиныдан 370 шақырым жердегі Лариса қаласының маңында жолаушылар мен жүк пойыздары соқтығысқанын хабарлаған. Жол апатынан кейін 270 жолаушы медициналық көмекті қажет етпегендіктен эвакуацияланып, автобуспен Салоникиге жөнелтілді. Екі пойыздың бір жолға түсіп кетуінің себептері әлі анықталған жоқ. Қазіргі кезде құтқару жұмыстары жалғасып жатыр. Аймақ губернаторы Костас Агорастос жараланғандар мен қаза тапқандар саны артуы мүмкін екенін айтты. Оның айтуынша, жолаушылар пойызының төрт вагоны рельстен шығып кеткен, ал алғашқы екеуі«толық қираған» деуге болады. Апат болған кезде пойызда шамамен 350 жолаушы болған.