Біртуар ғалым Қаныш Сәтбаевтың тағдыры туралы «Қаныш» телехикаясының толықметражды нұсқасы бүгіннен бастап кинотеатрларда көрсетіледі. Фильмге ғалымның 1926-1934 жылдардағы өмірі негіз болған. Геологтың Қарсақпай жеріндегі ірі тау-кен инфрақұрылымын ашу жолындағы еңбегі суреттеледі. Өмірбаяндық драманың сценарийі жазушы Медеу Сәрсекенің «Қазақтың Қанышы» романымен тікелей байланысты. 1 жарым сағаттық фильмде Қаныш Имантайұлының мықты геолог қана емес, сондай-ақ ондаған баланы аштықтан аман алып қалған ерекше тұлға екені көрсетілген. 2 ай ішінде түсірілген туынды қазірдің өзінде бірнеше халықаралық марапатқа ие болып үлгерді.Ерлан НҰРМҰХАМБЕТ, РЕЖИССЕР: Біз ең бастысы сол аураны көрсеткіміз келді. Сол уақыттағы, сол замандағы аурасын. Біз Астанада түсірдік, Ұлттық Университеттің ішінде павильон жасадық. Одан кейін Баянауылға бардық, одан кейін Жезқазғанға бардық, Сәтпаевқа бардық, одан кейін Қарсақбайға бардық. Қаныш ағамыз қай жерлерде болды, сол жерлерге барып, бір сахна болса да түсірдік, бізге ол керек деп сондай идеямен жасағанбыз. Тау тұлғалы академикті сомдауға 300-дей үміткер ниет білдірген. Солардың арасынан Әсет Есжанның бағы мен бабы қатар шапты. Театр және кино актері бұл рөл оның паспортына айналғанын айтып, кинодағы қызығы мен шыжығы қатар жүрген сәттерімен бөлісті. Әсет ЕСЖАН, АКТЕР: Күнімен текст жаттау, күнімен съемка. Көзіміз қызарып, сонда режиссердің айтқаны бар: «Сенің шаршап, көзіңнің қызарғаны образыңа келіп тұр, өйткені Қаныш атамыз мынандай шаруаның бәрін демалып жүріп бітірмеген шығар?!». Сондықтан кейбір осындай қиындықтар образдың сәтті шығуына көмегін тигізген сияқты. Райымбек ЗЕКЕНОВ, ҚАЛА ТҰРҒЫНЫ: Көрсетілімнен шығым, тамаша бір әсер алдық. Керемет туынды шығыпты.Үлкен жұмыс жасалғаны көрініп тұр. Үлкен команда болған. Сол жылдардағы бір керемет атмосфераны көрдім өз басым. Тамаша кино Қ. Мерей