Қарағанды облысының Топар кентінде үш адамнан сібір жарасы анықталды. Елдімекеннің бір кіре берісіне блок-бекет қойылған. Ал екінші бағытта санитарлық бекет жұмыс істеуде. Мал, ет, сүт өнімдерін сыртқа шығаруға, немесе ауылға кіргізуге тыйым салынған. Тұрғындар да бақылауда. Ветеринарлардың ақпаратынша, қауіпті инфекция жұқтырған үш адам - бір отбасының мүшелері. Олар бұзауды сойып, етін жеген. Содан кейін өздерін жайсыз сезініп, дәрігер шақыртқан. Қазір барлығы ауруханада жатыр. Кентте өзге ауру ошағы анықталмаған. Алдын-ала болжам бойынша инфекция сырттан жеткізілген жем-шөптен болуы мүмкін.