Қазақ телевизиясына-65 жыл. Бүгін осыған орай қара шаңырақта салтанатты шара өтті. Мерейтойға Қазақстан Республикасының Мемлекеттік кеңесшісі, Ақпарат және қоғамдық даму министрі, теларна ардагерлері, қоғам қайраткерлері және зиялы қауым өкілдері қатысты.«Qazaqstan» телерадиокорпорациясы – 4 республикалық телеарна, 15 аймақтық арна, 4 радио мен 20-дан астам интернет порталды біріктіретін еліміздегі ең ірі медиақұрылым. Бірегей арнаның бұрынғы басшысы, қазіргі ҚР Мемлекеттік Кеңесшісі Ерлан Қарин телеарнаны мерейтоймен құттықтап, Президент Қасым-Жомарт Тоқаевтың құттықтау сөзін оқыды. Ерлан ҚАРИН, ҚР МЕМЛЕКЕТТІК КЕҢЕСШІСІ: Қазақстан – қазақ журналистикасының ұстаханасы. Телевизия саласының көптеген майталманы Ұлттық арнадан шыңдалып шыққаны белгілі. Осы орайда жас ұрпаққа тәжірибесін үйретіп, тағылымды тәрбие беріп жүрген аға буын өкілдеріне шынайы алғысымды білдіргім келеді. телеарна журналистері әрдайым халық үшін еңбек ете береді деп сенемін. Баршаңызға зор денсаулық, бақ-береке және шығармашылық шабыт тілеймін. Жақсы жаңалықтарыңыз көп болсын! Қасым-Жомарт Тоқаев. Мәдениет және Спорт министрі Асхат Оралов та өзінің жүрек жарды тілегін айтып, бұл арнаның ел үшін алар орны ерекше екенін атап өтті. Асхат ОРАЛОВ, ҚР МӘДЕНИЕТ ЖӘНЕ СПОРТ МИНИСТРІ: Үлкен телеарна. Қазақстанның барлық аумақтарында, барлық аудандарына, шалғайдағы ауылдарына көрсетіледі. Сондықтан қазір мемлекетте болып жатқан саяси өзгерістерге де назар аударып, қарапайым халыққа түсінікті тілмен барлық хабарды, ақпаратты жеткізуде. Сондықтан осы сәтті пайдалана отырып, барша біздің БАҚ өкілдеріне, «Қазақстан» корпорациясына алғысымды білдіремін. Мерейтойға орай қазақ телевизиясында әр жылдары қызмет еткен ардагер-журналистер, дикторлар, режиссерлер мен спорт комментаторлары мерейтойлық медальдармен марапатталды. Олардың арасында арнада 1998 жылдары еңбек еткен - Роза Жүніс те бар. Роза ЖҮНІС, АРДАГЕР-РЕДАКТОР: Бүгін қуанышты күн. 65-ке келіппіз. Әдемі болып, жас кезімізден бастап осы телеарнада жұмыс істедік. Мен келгенде 22-23-те ғана болғанбыз. Бүгін үлкен мереке. Бәріміз қуанып жатырмыз. Осы мереке мерекеге ұлассын дегім келеді. 1958 жылы 8 Наурызда Алматы студиясы арқылы алғашқы сигнал бүкіл елге тарады. Тұңғыш қазақ телеарнасының тырнақалды хабарын республика көрермендері 4100 теледидардан тамашалаған. Бастапқыда күніне 5 сағат қана хабар берілді. 70-жылдары эфир телебайқаулармен, 80-жылдары ток-шоумен толыққан. Сан түрлі өзгерісті бастан кешкен қазақ телевизиясының қара шаңырағы-Ұлттық арнаның 65 жылда халқымыздың рухани құндылықтарының дамуына қосқан үлесі өлшеусіз.