Астанадағы «Шарапат» әлеуметтік қызмет көрсету орталығына «Қазақстан халқына» қоры қолдау көрсетті. Қордың демеушілігімен мекемеде түрлі аурулардың алдын алатын тұз шахтасы ашылды. Сондай-ақ жоғарғы және төменгі аяқтарға арналған жалпы сомасы 32 миллион теңге болатын оңалту құралдарымен жабдықтады. 64 жастағы Жұмағали Мағзұмов орталықта 5 айдан бері тұрады. 4 жыл бұрын короновирусқа шалдыққан соң, тез ентігіп, демікпе мазалайтын болған. Бұдан бөлек аяқ-қолдары қақсап, сүйегі сырқырағанды шығарыпты. Қазір тұз шахтасында ем алуда. Жұмағали МАҒЗҰМОВ, «ШАРАПАТ» ӘЛЕУМЕТТІК ҚЫЗМЕТ КӨРСЕТУ ОРТАЛЫҒЫНЫҢ ТҰРҒЫНЫ: Жиі келіп тұрамыз. 10 күнге назначение береді врачтар. Сосын физиолечениелрі бар, өте жақсы. Техникалар әкеліп берген аяқ-қолға, сонымен емделіп жатырмыз. Рақметімізді жаудырып отырамыз әрқашанда. Қор жарты жыл бұрын тарту еткен аппараттардың нәтижесі көп күттірмеді. Бүгінгі күннің өзінде инсульт алып, жағдайы нашарлап кеткен бірнеше адамның беті бері қараған. Ержан АБДЫКАРИМОВ, «ШАРАПАТ» ӘЛЕУМЕТТІК ҚЫЗМЕТ КӨРСЕТУ ОРТАЛЫҒЫ МЕДИЦИНА БӨЛІМІНІҢ МЕҢГЕРУШІСІ: Кейбір адамдар бір жақ қолы сал, аяғы сал болып қалып жатады. Сол адамдарға ерекше көмегін тигізіп жатыр. 4-5 адамымыз бар қазір жүре бастаған, қолын көтере бастаған, есту, сөйлеу қабілеттері жақсы бола бастағандар бар. 2022 жылы Президент Қасым-Жомарт Тоқаевтың тапсырмасымен жұмысын бастаған «Қазақстан халқына» қоғамдық әлеуметтік қорының қайырымдылық бағдарламалар мен жобаларының жалпы құны бүгінде 200 млн теңгеге жетті. Қор денсаулық сақтау, әлеуметтік қолдау және оңалту, білім беру, спорт және төтенше жағдай бағыттары бойынша халыққа қолдау көрсетеді. Марат МҰХАМЕДСАЛИЕВ, «ҚАЗАҚСТАН ХАЛҚЫНА» ҚОҒАМДЫҚ ҚОРЫНЫҢ РЕСМИ ӨКІЛІ: Қор жұмысының басты принциптерінің бірі – жиналған қаражатты тиімді жұмсау. Бағдарламалардың 50 проценті медицина, дәрі-дәрмекпен қамту саласына бағытталған. Оның ішінде құны 1 млрд теңге болатын ең қымбат, инновациялық Золгенсма препаратын алған 13 бала бүгінде қалыпты өмір сүріп жатыр. Шамамен 400 адам өмір бойы қабылдауға қажетті дәрі-дәрмек алып отыр. Айта кету керек, Қордың Қамқоршылық кеңесі биыл су тасқынынан зардап шеккен аймақтарға үй салуға 10 млрд теңге бөлу туралы шешім қабылдады. Нәтижесінде еліміздің 5 өңірінде 550 үй салынбақ.