«Қазақстан Халық партиясының» республикалық үгіт-насихат штабының мүшелері Өскеменге ат басын тіреді. Қоғамдық бірлестің аймақтағы белсенділерімен кездесті.Ұйым төрағасы Ермұхамет Ертісбаев қоғамдық бірлестіктің аймақтағы белсенділерімен жолығып, партияға жаңадан қабылданған 30 адамға куәлік табыстады. Күн тәртібінде электоралды кезеңнің он күндік қорытындысы шығарылды. Кандидаттар агитация басталғалы бері 700-ден астам іс-шара өткізіпті. Жақын арада тағы үш мыңға жуық кездесу жоспарланған. Еліміздің 17 облысы мен үш мегаполисіндегі кездесулерге 100 мыңнан астам адам қатысқан. Олардың басым бөлігі еңбек адамдары. Қызмет салалары сан-алуан. Айта кетейік, «Қазақстан Халық партиясы» атынан Мәжіліс депутаттығына 66, жергілікті мәслихаттардағы мандатқа 500-ге жуық үміткер ұсынылған. Ермұхамет ЕРТІСБАЕВ, «ҚАЗАҚСТАН ХАЛЫҚ ПАРТИЯСЫ» ҚБ ТӨРАҒАСЫ: Кездесулерге жеке өзімде қатысып жүрмін. Мұның алдында ғана Қарағандыда болдым. Металлургтер, дәрігерлер, зауыттардағы 14 ұжыммен жүздесіп партияның сайлауалды бағдарламасын таныстырдық. Мұндай бетпе-бет форматындағы жиындар үлкен маңызға ие. Өскеменде де кәсіпорындар, бизнес, әлеуметтік сала қызметкерлеріне барып үгіт-насихат жұмыстарын өткіземіз.