Осы аптада ҚР ПІБ Медорталығының күндері аясында елордадағы аурухана мен Орталық клиникалық ауруханасының, «Оқжетпес» емдеу-сауықтыру кешенінің, Санитарлық-эпидемиологиялық сараптама орталығының, Жоғары технологиялар және ақпараттық жүйелер орталығының мамандарынан, сондай-ақ «Қарлығаш» балабақшалар желісінің педагогтарынан жасақталған делегация Шымкент қаласына барды. Медициналық орталықтың өңірлердегі күндерін өткізудегі басты мақсат – дәрігерлер мен педагогтардың біліктілігін арттыру, тәжірибе алмасу, медициналық туризмді дамыту. Үш күн ішінде Медорталық ауруханаларының дәрігерлері 160-қа жуық тегін консультациялық көмек берді. Қала тұрғындарын жоғары білікті аритмолог, генетик, онколог және онкохирург, гастроэнтеролог, пульмонолог, нейрохирург және кардиохирург мамандар қабылдады. Олар күрделілігі әртүрлі 17 операция жасады. Шымкент сапарының бағдарламасына дәрігерлер мен мұғалімдерге арналған тренингтер мен шеберлік сабақтары да қамтылған болатын. Соның аясында Медициналық технологиялар және ақпараттық жүйелер орталығының делегациясы №1 қалалық клиникалық аурухана дәрігерлерімен кездесу өткізді. ҚР ПІБ Медорталығының «Қарлығаш» балабақшасының өкілдері Шымкент қаласындағы мектепке дейінгі ұйымдардың қызметкерлеріне дөңгелек үстел ұйымдастырды. Кездесуде елордалық педагогтар оқыту әдістері мен балалардың денсаулығын сақтауға және жақсартуға қатысты тәжірибелерімен бөлісіп, «Білім беру сапасын бағалауда ECERS-3 шкаласын қолдану» тақырыбында семинар-тренинг, «Инновациялар саласындағы инновациялар» тақырыбында шеберлік сбағын өткізді. Санитарлық-эпидемиологиялық сараптама орталығы қаланың медициналық ұйымдарының бас дәрігерлері мен орынбасарларына эпидемиологиялық және азық-түлік қауіпсіздігі бойынша, ауруханада инфекцияның алдын алу және бақылау жайында тренингтер мен шеберлік сабақтарын өткізді. Іс-шараның соңғы күнінде ҚР ПІБ Медициналық орталығы мен Шымкент қаласының әкімдігі, Оңтүстік Қазақстан медицина академиясы және Santo фармацевтикалық компаниясы арасында ынтымақтастық туралы меморандумдарға қол қойылды.
Жаңалықтар
