Қызылжарда қаржы пирамидасының ісі әшкерленді. Гермес атты компания жұртты арзандатылған тұрғын үй ипотекасын береміз деп алдап, артынша соқыр тиынсыз қалдырған. Жалған ұйым теріскейде 2019 жылдан бері жұмыс істеп келген. Құзырлы орган өкілдерінің хабарлауынша, осы уақыт аралығында 80-ге жуық адам тіркелген. Алайда, олардың біреуі де армандаған баспанасына қол жеткізе алмапты.Юлия ДВОРНИК, ЖӘБІРЛЕНУШІ: Мен Гермес компаниясына мың доллар салдым. Олар мені арнайы сайтта тіркеді. Бірнеше айдың ішінде мен жарна төлемін 10 мың долларға дейін жеткізуім тиіс еді. Алайда, 2022 жылы бұл сайт мүлде жұмыс істемей қалды. Кейін құзырлы органға жүгінуге тура келді. Қатысушылар қатары қалың болғанымен, экономикалық тергеу департаментіне 4-ақ адам көмек сұрап, жүгінген. Ізінше құзырлылар қаржы пирамидасының заңсыз ісін дәлелдеп, істі сотқа жолдады. Сорақысы сол, бұл компанияның тек Петропавлдағы филиалы ғана жабылды. Демек, өзге өңірлерде ол арам ісін жалғастыруы мүмкін, дейді сала мамандары. Виктория АЛПЕЕВА, СҚО БОЙЫНША ЭКОНОМИКАЛЫҚ ТЕРГЕУ ДЕПАРТАМЕНТІНІҢ БАСҚАРМА БАСШЫСЫ: Тергеу барысында аталған компания арыз жазған төрт адамның шығынын қайтарып берді. Айта кету керек, соңғы үш жылда Қызылжар өңірінде екі қаржы пирамидасы анықталды. Біз тұрғындарды күмәнді компанияларға қаражат бермеуге шақырамыз. А. Құрманкин