«Манчестер Юнайтед» қорғаушысы Рафаэль Варан қысқы трансферлік терезе кезінде клубты ауыстыруы мүмкін, деп хабарлайды BasSport.kz.Француз ойыншысы ағылшын клубында өзін бақытсыз сезінетін көрінеді, сондықтан «Реалға» оралу жағын қарастырып жатыр екен. Мадрид командасы да 30 жастағы футболшыны қайтаруға ниетті. Себебі «корольдік» клубтың орталық қорғаушылары Эдер Милитао мен Давид Алаба жарақаттан әлі айыққан жоқ. Белгілі болғандай, Варанға «Бавария»да қызығушылық танытуда. Мюнхендіктер қорғаушыға € 10-20 млн төлеуге дайын. Бұл маусымда Варан «Манчестер Юнайтед» сапында 14 матч өткізіп, бір гол соқты. Ағылшын клубымен қазіргі келісімшарты 2025 жылғы маусымға дейін есептелген. Transfermarkt мәліметінше, футболшының нарықтағы құны – € 25 млн. Бұған дейін «Реалдың» бас бапкері Карло Анчелотти де Варанның оралуын күтіп жүргені хабарланған. Айта кетейік, француз қорғаушысы мадридтіктер сапында италиялық бапкердің қарамағында 2013 пен 2015 жылдар аралығында ойнаған.