"Respublica" партиясы үгіт-насихат жұмыстарын еліміздің батыс аймақтарында жалғастырды. Ауыл шаруашылық, әлеуметтік мәселелерді талқылап, саяси науқанның маңызын түсіндірді.Respublica партиясы Ақтөбе облысына ат басын тіреді. Әуелі ақсақалдармен кездесіп, өздерінің сайлауалды бағдарламасын таныстырды. Ашық диалог форматында өткен басқосуда қоғамдағы біршама түйіткілді тақырыптар талқыланды. Алқалы жиынға келген үлкендер ауылшаруашылығының әлеуетін жоғарылату керек дейді. Оның ішінде тері өңдеу ісіне тереңдеу қажет деген ұсыныстарын айтты. Партия жетекшілері талап-тілектерді тыңдап, ойларымен бөлісті. Ал еліміздің батыс өңіріне барған Республикашылар Орал қаласының халқымен кездесіп, мүмкіндігі шектеулі жандардың жағдайын жақсарту мәселесін көтерді. Қатысушылар бұл мәселеде онлайн қызметтерге қажеттіліктің көп екенін жеткізді. НҰРБОЛАТ БАЙМҰРАТОВ, "RESPUBLICA" ПАРТИЯСЫ БҚО ФИЛИАЛЫНЫҢ БАСШЫСЫ: Біздің штаб күнделікті үгіт-насихат жұмыстарын атқарып жатыр. Еліміздің түкпір-түкіпірінен әр түрлі мәселелерді көтеріп, хабарласып жатқан жұрт көп. Басым бөлігі әлеуметтік жағдайға қатысты. Бүгін қала халқымен бірнеше кездесулер ұйымдастырылды. Жиынға келушілердің саны мыңға жуықтайды.