Турнирге қатысушылар мен ұйымдастырушыларға Президент Қасым-Жомарт Кемелұлы Тоқаев сәттілік тіледі. Жарысқа әлемнің 38 елінен 500-ден астам спортшы қатысады. Олардың қатарында Швеция, АҚШ, Оңтүстік Корея, Франция, Германия, Норвегия, Австрия, Жапония, Ұлыбритания және басқалары бар, деп хабарлайды Zakon.kz.Салтанатты ашылу рәсімі негізгі жарыс алаңына айналған қысқы спорт түрлері бойынша олимпиадалық даярлау орталығының шаңғы-биатлон стадионында өтті. "Еліміз осындай деңгейдегі биатлон турнирін алғаш рет өткізіп отыр. Бұл әсіресе қазақстандық жас спортшылардың АҚШ-тағы қысқы Универсиададағы және басқа да ірі старттардағы соңғы жетістіктері аясында маңызды. Біздің елде биатлонның болашағы зор және бұл чемпионат азаматтарымыздың тек биатлонға ғана емес, жалпы қысқы спорт түрлеріне қызығушылығын арттыратынына сенімдімін. Біздің басты міндеттеріміздің бірі - осы", - деді Мәдениет және спорт вице-министрі Сәрсен Құранбек. Биатлоннан жастар мен жасөспірімдер арасындағы әлем чемпионаты 12 наурызға дейін өтеді. Оған Қазақстан атынан 20 спортшы қатысады.