Шымкентте «Нұрлы жер» бағдарламасы бойынша пәтерлі болудан үмітті ондаған отбасы бүгін қалалық әкімдікке келіп шу шығарды. Наразы топтың айтуынша, жоспар бойынша олар өткен күзде қоныс тойын тойлауы тиіс болған. Алайда үйге кірмек түгілі, көпқабатты төрт үйдің құрылысы әлі аяқталмады деп ашынады.172 отбасы банктің байқауынан былтыр сәуірде өткен. Құзырлылардың соңғы берген уәдесі бойынша қаңтардың соңында пәтердің құжаттары мен кілтін алуы тиіс еді. Алайда ол жай сөз күйінде қалды дейді. Жұрт пәтерден пәтерге көшіп, қиналып кеткендерін жеткізді. Ал уәделі баспананың құрылысы әлі толық аяқталмаған көрінеді. Қала әкімі де бірлі жарым кемшіліктің барын жасырмайды. Жауапсыз мердігер жауапсыз қалмайды дейді. Мұрат ӘЙТЕНОВ, ШЫМКЕНТ ҚАЛАСЫНЫҢ ӘКІМІ: Кәсіпкердің ақшасы жоқ. Егер де ол кәсіпкерді сол кезде сотқа беретін беріп, оны әрі қарай іс қозғап жасаған кезде үй ешқашан бітпейтін еді. Сол себептен, өйткені ол ақшаны жеген..сол себептен мен спонсорлар ақша тауып, 380 млн теңгедей спонсор тауып, үйді бітіріп аяқтап жатыр. Ең бастысы қалған кемшіліктерді мердігер бес жылға дейін түзетіп отырады. Гарантиясы бар. Тұрғындарға пәтер кілті 15 ақпанда беріледі. Кем-кетік біртіндеп реттелмек. Асхат ҚҰДАЙБЕРГЕНОВ, ТҰРҒЫН: Кемшіліктер бар, су , лифт бітпеген. Майда-шүйде құлап жатқан жерлері бар. Оларды бітіріп береміз деп жатыр. Бізге документ пен кілтті беріңіздер деп жатырмыз. Құлаған жері жәйлап бітеді деп жатырмыз. Айзада ТӨРЕБЕКҚЫЗЫ, ТІЛШІ: Құрылыс жұмыстары 99 процентке аяқталған бұл үйлердің іші біткенімен, сырты әлі күнге көріп тұрғанымдай айра-жайра болып жатыр. Қазір мына жер тоң болып қатып тұрғанмен күннің көзі шықса болды ми батпаққа айналайын деп тұр. 15 ақпаннан көшіп келеміз деп үміттенген халықтың ендігі уайымы сол болып тұр. Көктемге дейін бұл мәселе де шешіледі дейді билік өкілдері. Ал әзірге уақытша тас төселеді. А. Төребекқызы
Жаңалықтар
