Солтүстік Қазақстан облысы Есіл ауданындағы газ құю стансасында 5 литрлік газ баллоны жарылып, осы орталықтың жұмысшысы, ер адам күйік алды, деп хабарлайды ҚазАқпарат.СҚО төтенше жағдайлар департаменті баспасөз қызметінің мәліметінше, 11 ақпан күні сағат 14.32 минут кеткенде «101» қызметіне Есіл ауданы Явленка елді мекені, Ибраев, 75 мекенжайында өрт шыққандығы туралы хабар түскен. Өрт сөндірушілер жеткенде «Алыс Газ» ЖШС-нің операторы отыратын ғимараты көк түтінге оранған екен. «Явленка елді мекеніндегі газ құю стансасының 42 жастағы жұмысшысы 5 литрлік газ баллонын даладан ішке кіргізіп, жылыту батареясының жанына қойған. Ол біраздан кейін ашылып кетіп, жарылған. Арты өртке ұласқан. Газ баллоны газ мөлшерін өлшеу үшін қолданылған екен», - дейді Есіл аудандық төтенше жағдайлар бөлімінің бастығы Жұлдыз Есенғазин.Салдарынан ер адамның денесінің 90 пайызын күйік шалды. Мамандардың айтуынша, қазір жағдайы ауыр. Жансақтау бөлімінде жатыр. Өрттен ғимараттың шатыры толық жанып кетті, қабырғаларына, есік, терезесіне және жиһазға зақым келді. «Өрт сағат 15.03-те толық сөндірілді. Осы дерекке қатысты Төтенше жағдайлар бөлімі қылмыстық іс қозғады», - дейді Жұлдыз Есенғазин.