БҰҰ-ның гуманитарлық агенттіктері сәрсенбі күні Суданда 11 ай бұрын басталған әскери қақтығыс «әлемдегі ең ауыр ашаршылықты» тудыруы мүмкін екенін ескертті, деп хабарлайды KAZINFORM.БҰҰ Дүниежүзілік Азық-түлік бағдарламасы (WFP) атап өткендей, ел қазірдің өзінде ел халқының мәжбүрлі қоныс аударуын бастан кешіп отыр. Судан армиясы мен Жедел әрекет ету күштері (RRF) деп танымал топ арасындағы шайқас салдарынан мыңдаған адам қаза тауып, сегіз миллионнан астам судандық босқынға айналған.БҰҰ Балалар қорының (ЮНИСЕФ) хабарлауынша, қазіргі кезде Судан 14 млн баланың өмірін құтқаратын көмекке мұқтаж болып отыр. Гуманитарлық қызметкерлер сондай-ақ ұрыс тоқтамаса, қақтығыс Судан шекарасынан асып, бүкіл аймақтағы қауіпсіздікке қауіп төндіретінін ескертті.«Жиырма жыл бұрын Дарфур әлемдегі ең ауыр ашаршылықты бастан кешкенде, әлем дағдарысқа жауап беру үшін бірікті. Бірақ бүгінде Судан халқы назардан тыс қалды. Миллиондаған адамның өмірі мен тұтас бір аймақтың тыныштығы мен тұрақтылығына қауіп төніп тұр», - деді Оңтүстік Суданнан келген WFP атқарушы директоры Синди МакКейн.Қазіргі уақытта Судандағы 18 млн адамға азық-түлік жетпей отыр. Дүниежүзілік азық-түлік бағдарламасының соңғы деректеріне сәйкес, ел тұрғындарының бес пайыздан азы ғана толық түскі немесе кешкі ас ішуге мүмкіндігі бар.
Жаңалықтар
