Сырдарияның суы Қызылорда іргесіндегі Талсуат елдімекенінің тұрғындарын азанымен дүрліктірді. Сең жүрген уақытта арнасына сыймаған су бірнеше жылдан бері табаны құрғап кеткен ауыл ішіндегі каналға құйылған. Ал ол тасып, бір үйдің ауласын басты. Абырой болғанда, дер кезінде қызыл су бөгелген. Бірақ халық әлі де үрей құшағында отыр.Бұл каналға соңғы рет қашан су келгені тұрғындардың есінде жоқ. Іші топырақпен көміліп, арнасы тарылып қалған. Сондықтан болар бас-аяғы бір жарым сағаттың ішінде суға лық толды дейді тұрғындар. Тіпті ернеуінен асып, іргесіндегі үйдің ауласына жайылған. Талсуат елдімекені Сырдарияның іргесінде орналасқан. Сондықтан сең жүрген тұста бұл аумаққа төнер қауіп жоғары. Қазір ауыл халқы төтеншеліктермен бірге білек сыбанып, өзен бойындағы бөгеттерді мықтап жатыр. Әзірге суды жайылымға жырып, тұрғын үйлерді сақтап қалудың амалын жасауда. Айжігіт ЕРНИЯЗОВ, ТАЛСУАТ АУЫЛДЫҚ ОКРУГІНІҢ ТҰРҒЫНЫ: Елдімекен дариядан төмен тұр. Ана жақта саяжайлық жерлер бар. Саяжай мүлде төмен. Сондықтан алаң болады ғой халық. Қазір облыс аумағына секудына 700 текше метрден аса су келіп жатыр. Бұл былтырғымен салыстырғанда әлдеқайда көп. Сондықтан қауіпті саналатын 29 аумақты мамандар кірпік қақпай бақылап отырмыз дейді. Нұрсұлтан ИБРАГИМОВ, ОБЛЫСТЫҚ ТӨТЕНШЕ ЖАҒДАЙЛАР ДЕПАРТАМЕНТІ БАСШЫСЫНЫҢ ОРЫНБАСАРЫ: Қауіпті аумақтың барлығына түсіндірме жұмыстары, үн парақтары таратылды. Сонымен қатар фазендаларда орналасқан жерлер бар. Фазендада малдарды қауіпсіз аймаққа шығарып қою сол бойынша түсіндірме жұмыстары жүргізілді. Барлық көл мен шабындықтың 70-80 проценті суға толған. Мамандар жағдайды әуеден де бақылап отыр.