Түркістан облысының тұрғынынан 260-тан астам оқ-дәрі тәркіленді, – деп хабарлайды Polisia.kz. Түркістан облысы полиция департаменті экстремизмге қарсы іс-қимыл басқармасының қызметкерлері “Қару” жедел-профилактикалық іс-шарасы барысында Созақ ауданынан заңсыз оқ-дәрілерді анықтады. Нақтырақ айтсақ, жедел уәкілдерге жергілікті тұрғындардың бірі үйінде патрондарды заңсыз сақтайтыны туралы ақпарат келіп түсті. Бұл бойынша жан-жақты жұмыс атқарған полиция қызметкерлері тез арада күдіктінің мекенжайын анықтады. Аталған мекенжайға тінту жүргізу кезінде ауыл тұрғынының үйіндегі түрлі калибрлі 260-тан астам заңсыз сақталған оқ-дәрі тәркіледі. Алынған заттай дәлелдемелер сараптамаға жіберілді. Осы жайт ҚР ҚК-нің 287-бабы (Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру) бойынша тіркелді. Сотқа дейінгі тергеу амалдары жүргізіліп және оқиғаның толық мән-жайы анықталып жатыр.
Жаңалықтар
