Ассалаумағалейкум, спортсүйер көрермен! Спорт әлеміндегі соңғы ақпараттармен бөлісейін. Еуропа лигасының плей-офф кезеңінің қарымта кездесуінде "Манчестер Юнайтед" өз алаңында "Барселонаны" қабылдады. «Олд Траффордта» өткен матчта бірінші болып қонақтар гол соқты. 18-минутта Бруну Фернандештің фолынан кейін Роберт Левандовски айып добын мүлтіксіз орындады. Бірінші тайм толықтай Барселонаның басымдығымен өтті. Ал МЮ екінші таймды сәтті бастады. 47 минутта қорғаушы Фред таразы басын теңестірді. Онымен қоймай Тен Хаг шәкірттері камбэк жасады. 73 минутта бразилиялық вингер Антони командасына жеңіс голын сыйлады. Осылайша қызыл сойқандар Еуропа Лигасының 1/8 финалына жолдама алды.Эрик ТЕН ХАГ, «МАНЧЕСТЕР ЮНАЙТЕД» ФК БАС БАПКЕРІ: Келесі кезеңде бізді қазір кім күтіп тұрғаны маңызды емес. Мен қазір Ньюкаслмен матч туралы ойланып жүрмін. Кім күтіп тұрса да, бізге жеңіс керек. Десе де мен кез келген қарсыласты бірдей көріп сыйлаймын. Сондай-ақ кешегі қарымта матчттардың бірінде италиялық "Ювентус" франциялық "Нантты" ойсырата ұтты. Барлық үш допты жартылай қорғаушы Анхель Ди Мария соқты. Алдымен аргентиналық алыстан тамаша соққы бағыттап, қақпашыны қапы қалдырды. Доп 9-дыққа дөп тиді. Кейінірек 11 метрлік айып добын сәтті орындады. Алаң иелері 10 ойыншымен қалып, Ди Мария бұл мүмкіндікті де өз пайдасына шеше білді. Хет трик авторы атанған 35 жастағы ойыншы командасына жеңіс әкелді. Мұнымен ол Ювентустың 21 ғасырдағы еврокубоктік кездесулерде қонақта қатарынан 3 гол салған алғашқы ойыншы болып отыр. Массимилиано АЛЛЕГРИ, "ЮВЕНТУС" ФК БАС БАПКЕРІ: Мен ойынға дән ризамын. Бірінші тең кездесуден кейін бұл ойын оңайға соқпайтыны түсінікті болды. Дегенмен команда сапындағы Ди Мария нағыз чемпионға тән ойын көрсетіп, басқалардан ерекшелене білді. Чемпиондар Лигасынан шығып кеткендіктен Еуропа Лигасында атой салып жеңеміз деген сөз жоқ. Дегенмен А Сериясындағыдай соңына дейін баруға барымызды саламыз. "Әл-Наср" клубында ойнайтын әлем футболының жұлдызы Криштиану Роналду Сауд Арабиясының құрылғанын күнін ерекше атап өтті. Мұны спортшы жариялаған видеодан байқауға болады. Криштиану арабтардың ұлттық киімін киіп, шейхтармен шай ішіп, қылышпен би биледі. Португалдық Сауд Арабиясын айтулы датамен құттықтап, бұл мереке ол үшін де ортақ екенін жеткізді. Супер орта салмақтағы абсолютті әлем чемпион Сауль "Канело" Альварес қазақстандық боксшылармен тәжірибесімен бөлісті. Мексикандық Әбілхан Аманқұл мен Бек Нұрмағанбетпен оқу-жаттығу өткізіп, спортшыларымызға тапсырма беріп, әдіс-тәсілдерді мысалмен түсіндірді. Сондай-ақ, қазақстандық жанкүйерлерге сәлем жолдады. Қазақстан құрамасының қорғаушысы Нұрәлі Әліп РПЛ-дағы ең қымбат трансфер тізіміне енді. "Зенит" 23 жастағы қорғаушыны «Қайраттан» 2 млн еуроға сатып алған. Өткен жылдың ақпанынан бастап, ол көк-ақ түсті жейдемен 20 матч өткізіп, Ресей чемпионы және ел Суперкубогының иегері атанды. Осы маусымда Нұралы барлық турнирлерде алаңға небәрі сегіз рет шықты. Негізгі құрамның тізімінен табылу үшін бәсекелесі Роберт Ренаннан бір бас жоғары ойнау қажет.Спорт жаңалықтары бүгінге осындай. Спортшыларымыздың құны өсіп, шеберлігі артып, мерейі үстем болсын!
Жаңалықтар
