«Шетелдіктерге қарағанда біздің құтқарушылар тәжірибелі болды». Түркиядағы жойқын жер сілкінісі кезінде қызмет еткен алматылық құтқарушы Ерлан Өтемұратов осындай ой түйді. Газиантеп қаласында 12 күн бойы адамдардың өмірін сақтап қалуға тырысқан құтқарушымен Мөлдір Жақан тілдесті.Ерлан Өтемұратов – 38 жаста, көпбалалы әке. Құтқарушы қызметінде жүргеніне биыл 8 жыл. Ол өз жұмысына аса сүйіспеншілікпен қарайды. Айтуынша, құтқарушы болу - бала кездегі арманы. Ерлан Өтемұратов Газиантепте жер сілкінісінен зардап шеккен 4 объектіде жұмыс атқарды. «Ешқандай қорқыныш болған жоқ. Бәріне дайын болдық»,- дейді ол. Ерлан ӨТЕМҰРАТОВ, ҚҰТҚАРУШЫ: Екінші объектімізден тірі шықты. 20 сағаттай қаздық қой оны. Бәріміз ауысып қазып шықтық қой. 20 сағаттан кейін шықты примерно 3 адам. Әкесі баласын күтіп тұрған, шешесі баласын күтіп тұрған, тірі шығады деп үмітте тұрған. Соларға қарап жүрек ауырады енді. Біз қарап тұрмыз уже, тірі шығатын возможность та болмай тұр. Мыжылып қалған бәрі. Біз қанша уақыт жұмыс істедік, олар сонша уақыт күтіп тұрды ғой сол жерде. Құтқарушыларға 16 сағат жұмыс істеп, 8 сағат демалысқа берілген. Алайда, «тіпті, демалуға да дәтіміз бармады»,- дейді Ерлан Өтемұратов. Сөзінше, амалы қалмаған халық тірі адам түгіл, туған туысқандарының өлі денесін көргеніне де қуанған. Қазақстандық құтқарушылар ерекше тактикаларымен көзге көрініп, адам денесінің бөлшектенуіне жол бермей, әр марқұмның арулап көмілуіне жағдай жасады. Мұның бәрін олар елде күнделікті оқу-жаттығулар барысында үйренген. Ерлан ӨТЕМҰРАТОВ, ҚҰТҚАРУШЫ: Ана жердегі жұмысты көрсеңіз, демалғың да келмей қалады. Халық күтіп тұр, демалып жату ыңғайсыз болады. Әйтеуір, бір сағат-екі сағат көзіңді жұмып аласың да, қайтадан тұрасың. Басқаларға қарағанда біздің адамдардың опыттары көп секілді болды. Олар, өйтені, бізден кеп сұрайды ақылдарын. «Мәйітті көріп қалдық, қалай шығарса болады» деп бізден кеп сұрайды. Біз қалай айтамыз, солай істеп, бізге қарап тұрады, көбінесе. Түркиядағы жер сілкінісі кезінде қазақстандық құтқарушылар 7 адамды аман алып қалып, 100-ге жуық адамның мәйітін алып шықты. Құтқарушылардың еңбегі- ерен. Күніне оларға түрлі шақыртулар келіп түседі. Қызметкерлер бастарын қатерге тіксе де, тез арада жиналып, апат орнына асығады.