Алаш тарихының Батыс елдеріндегі зерттелу тарихына үңіліп, жіті зерттеп жүргеніме біраз уақыт болды. Батыста жарық көрген көптеген еңбектерде Алаш қозғалысының тарихы, ұлт-азаттық қозғалысының негізін салған көшбасшылары Әлихан Бөкейхан, Ахмет Байтұрсынұлы, Міржақып Дулатұлы сынды зиялылар туралы дерек, мәліметтер жазылған. Батыс елдерінде жазылған, зерттелген Алаш тарихына, жетекшілері мен мұраларына қатысты еңбектер Қазақстандағы әріптестерімнің және Алаш тарихына көңіл бөлетін жұртшылықтың да қызығушылығын тудырар деген оймен, қолымдағы мәліметтермен бөлісуді жөн санадым.