Ақан серінің шығармашылығы – табиғат пен адам жанын қатар өрген сырлы әлем. Оның әндерінде дала тынысы, қыранның самғауы, тұлпардың дүбірі ғана емес, адамның ішкі күйзелісі, сағынышы мен жалғыздығы қатар өріліп жатады. Әрбір туындысында ақын өз тағдырын, заманының өзгерісін, серілік дәуреннің өтіп бара жатқанын сездіріп отырады. Сол шығармалардың ішіндегі ерекше мұңға толы, терең философиялық туындының бірі – «Қараторғай» әні.