Қазақ халқының елі мен жерін қорғап, өмірі ат үстінде жорықта жүрген талай батыр бабалар болған. Солардың бірі – Саңырық – батыр, мерген, қолбасшы (1691–1740). Тарихи тұлға Ұлы жүздің Ошақты тайпасының Тасжүрек руынан. Әкесі Тоқтыбай да батыр болған. Ол кісі кезінде батырлығымен бірге, таймас турашылдығымен, ауытқымас әділдігімен де елге танылып, аты шығыпты. Одан кейін Саңырықтың ағасы Дәнен, інісі Сарымерген де батыр болған. Атадан балаға жеткен әңгімелер арқылы Саңырықтың ұрпақтары аталарын «Ұзын бойлы, кең жауырынды, қолдары қарулы және түсі сұсты кісі болған» деп айтылып жеткен дейді. Ал, Саңырық батыр шешесі – жағынан Кіші жүз Жетіру ішінде Телеу Тайлақ батырдың жиені. Саңырық батыр жас кезінен батырлығымен таныла түсіп, кейін 1726 жылы Ордабасы Құрылтайына қатысып, 1727 жылы Бұланты шайқасына және 1729 жылы Аңырақай шайқастарында мергендер жасағын басқарған атақты қолбасшылардың бірі ретінде танылған [1].