Ұлы Отан соғысы жылдарында от пен оқтың ортасына өз еркімен аттанған қазақ қыздары аз болмады. Олар майдан даласында ерлермен иық тіресіп, асқан ерлік пен төзімділіктің үлгісін көрсетті. Солардың бірі – есімі көпке беймәлім, бірақ ерлігі елге өнеге болуға әбден лайық Мәдина Ысқақова. Ол 17 жасында ғана мектеп партасынан тұрып, туған елінің тыныштығын қорғау үшін майданға сұранып барған. Жастығына қарамастан, қайсар мінезі мен отаншыл рухының арқасында аты аңызға айналған үш мәрте Кеңес Одағының Батыры Иван Кожедубтың жеке авиамеханигі атанады.