Жаңа жыл барша адамзатқа ортақ мереке тәрізді қабылданғанымен, оны қарсы алу уақыты әлем елдерінде біркелкі емес. Кей халықтар жыл басын 1 қаңтардан бастаса, өзгелері көктемнің келуімен немесе Айдың қозғалысына негізделген күнтізбелік есеппен белгілейді. Бұл айырмашылықтың түп-төркіні дінге не салтқа ғана тіреліп қоймайды. Оның негізінде әр өркениеттің уақытты өлшеу тәсілі, табиғат құбылыстарын қабылдау ерекшелігі және астрономиялық есепке сүйенген күнтізбе жүйелері жатыр.