Таяуда Астана төрінде өткен халықаралық «Алтын Орда – дала өркениетінің үлгісі: тарих, археология, мәдениет, бірегейлік» атты симпозиум байырғы Ұлы дала елі мен бүгінгі Еуразия кеңістігі мемлекеттерінің сан ғасырлық тарихын, ықпалдастығын, елдік даму жолын, қоғамдық-саяси, әлеуметтік-мәдени институттарын, ұлысаралық сауда мен байланыс жүйелерін, бай рухани мұрасын, сондай-ақ өткен мен бүгіннің арасындағы жасампаздық, өркениеттілік сабақтастығын зерделеуге мол мүмкіндік туғызды. Шынында да отандық, өңірлік, әлемдік тарихтанудың, елтанудың бетбұрыс кезеңін анықтаған бұл ғылыми жиын жаңа пәнаралық жобалардың жүзеге асуына игі әсер етеді деп сенеміз.Осы симпозиумға жаһандық ынтымақтастық пен жауапкершілік туралы жүйелі идея көтеріп жүрген Қазақстан Президенті Қ.Тоқаевтың арнайы қатысып, байсалды баяндама жасауы ғылыми-интеллектуалдық шараның биік те сарабдал деңгейін көрсетті. «Тарих халықтардың арасын жалғайтын алтын көпір ретінде әділетті әрі қауіпсіз әлем құруға ықпал етуі қажет. Сол үшін ортақ мүдде жолында күш біріктіріп, бірлесе әрекет етуіміз керек. Бұл мәселеде ғылыми қауымдастық айрықша рөл атқаратыны анық» деді Мемлекет басшысы.
Басқа
