Біздің бүгінгі кейіпкеріміздің қандай да бір мансабы, ресми атақ-даңқы да жоқ. Бірақ айтары мол әрі мағыналы. Ол – бала күнінен ертегі-аңызды, қисса-дастанды құлағына құйып өскен қазақтың қарапайым қызы. Ол – тағылымы терең тәрбиенің арқасында университет табалдырығын аттаған шақтан-ақ болашақ өміріне үлкен жауапкершілікпен қараған студент. Ізденуден бір сәт танбаған Құндыз бүгінде асыл жар, ибалы келін, аяулы ана. Ол – үшемдердің анасы. Алладан пәрмен келіп, үшемдер бойына біткенге дейін даналыққа «жүкті» болған әйел. «Әнге әуес, күйге құмар бала жаны сұлу, өмірге ғашық болып келеді» демей ме Мұхтар Әуезов. Құндыз дәл сондай бала болды және сондай ұл, қыз тәрбиелеуге күш салып жүр. Бүгінде жас аналарға әлеуметтік желі арқылы өз болмысымызды баяндап, ұлттқ құндылығымызды дәріптеп жүрген блогермен біз де әңгімелесіп қайтқан болатынбыз.