Адамзат ақпараттық қоғамға аяқ басқалы бері түрлі даму жолына түсіп, ақпараттық технологиялармен бірге келген түрлі мәселемен де қатар ұшырасып жатыр. Оның ішінде қазақ қоғамы да мұндай тенденциялардан тыс қалған жоқ. Сондықтан да «қайтсек, қазақ қоғамын, қазақ тілін жаңа деңгейге көтереміз?» деген мәселе ұлтын, тілін сүйетін әрбір жанның санасында дабыл қағып тұрары хақ. Осы орайда қазіргі Қазақстанның білім саласындағы, аудармадағы, қазақ тілінің қолданыс аясы бойынша элитарлық топтар арасындағы мәселелерін қаузап, Bilim Media Group компаниясының негізін қалаушы, «Ұлттық аударма бюросы» ҚҚ атқарушы директоры Рауан Кенжеханұлымен тілдескен едік. Ендеше сол сұхбатымызды қадірлі оқырман назарына ұсынуды жөн көріп отырмыз.