Ұлытау облысының әкімі Дастан Рыспеков Ulysmedia подкастында «Қазақмыс» төңірегіндегі жағдай туралы сұрақтарға жауап беріп, корпорацияның жаңа басшылығынан не күтетінін және өңірдің ондаған жыл бойы өркениет игіліктерінен қалыс қалуы себебін түсіндірді. Бас редактор Самал Ибраеваға берген сұқбатында ол сотта өз абыройын не үшін қорғағанын, Қызылорда – Жезқазған тасжолының маңызын, су және медицина мәселелерінің қашан шешілетінін айтты. Рыспеков өңірге «ойын ережесін өзгертуге» келгенін, ал нәтижені көрсетуге үш жыл жеткілікті мерзім екенін айтады. Айта кетейік: Дастан Рыспеков 2024 жылғы қазан айынан бері Ұлытау облысын басқарады. Ол Жезқазған қаласының тумасы, мемлекеттік басқару және құқықтану мамандықтары бойынша екі жоғары білімі бар. Бұған дейін Алматы әкімі аппаратында, Есеп комитетінде, «Астана ЭКСПО-2017» компаниясында, Мәдениет және спорт министрлігінде және Президент әкімшілігінде еңбек еткен.