Әсіресе жастардың аузынан «папа жақтың туысы, мама жақтың туысы» дегенді жиі еститін болдық. Қарапайым қарым-қатынаста ғана емес, ел алдында сұхбат бергенде де, әлеуметтік желідегі ресми парақшасында да солай айтатын қазақтың қыз-жігіттері көбейді. Тіпті, тіке туысының тойына келіп тұрып той иелерінің өзіне кім болатынын дұрыс айтып бере алмай жатқан көзқарақты кісілердің «қызығы» әлеуметтік желіні шарлап жүреді. Соны әзілге айналдырып жүрген тамаданың түпкі мақсаты елді күлкіге қарық қылу ғана емес шығар. Оның ар жағында баласының құлағына құя алмаған ата-ананың осалдығы мен жастардың туыстық қарым-қатынасқа селқос қарауы жатса керек. Алайда біз ешкімді кінәламаймыз, тек айтамыз.
Мәдениет
