Әдеби мұраның жаңа қырлары зерттеушілер шығармалардың тікелей мазмұнына ғана емес, олардың астарындағы бейнелер жүйесіне, таңбалар әлемі мен мәдени ишараларға назар аударған кезде айқындала түседі. Абай Құнанбайұлының поэзиясы осындай көпқабатты талдауға ерекше мүмкіндік береді. Ақын шығармаларында қазақтың дәстүрлі дүниетанымы, исламдық ой-сана, Шығыс пен Батыс философиясының идеялары, сондай-ақ адам болмысы, иман және адамгершілік туралы терең толғаныстар өзара сабақтасып жатыр. Бұл мақалада Умберто Эконың семиотикалық тұжырымдамасы негізінде Абай шығармаларының түрлі мағыналық қабаттарын ашу, мәтінді интерпретациялаудың шекараларын айқындау және оқырманның мағына қалыптастыру үдерісіндегі рөлін пайымдау мәселелері қарастырылады. Зерттеуде, әсіресе, «Алланың өзі де рас, сөзі де рас» өлеңінің метафоралық жүйесіне, символдық құрылымына және ішкі семантикалық логикасына ерекше назар аударылады. Qazaqstan Tarihy порталы оқырмандарды Роза Хасенова мен Манифа Сарқұлованың зерттеуінің негізгі тұжырымдарымен таныстырып, семиотикалық талдау тәсілінің Абайдың поэтикалық әлеміне жаңаша ғылыми көзқараспен қарауға мүмкіндік беретінін көрсетеді.