Қазақ халқының тарихында ХІХ ғасырдың екінші жартысы мен ХХ ғасырдың басы ұлттық интеллигенцияның қалыптасу дәуірі ретінде ерекшеленеді. Бұл кезеңде Ресей империясының жоғары оқу орындарында білім алған қазақ жастары елге оралып, халықтың әлеуметтік, мәдени, ғылыми және саяси өміріне белсене араласты. Олардың қатарында заңгерлер, инженерлер, мұғалімдер, агрономдар және дәрігерлер болды. Әсіресе жоғары медициналық білім алған қазақ жастары ұлт денсаулығын сақтаумен қатар, қоғамдық ойдың дамуына, ағартушылық қызметке және ұлттық қозғалыстың қалыптасуына елеулі үлес қосты.