VI ғасырдың орта шенінде тарих аренасына шыққан далалық Түрік қағанаты көптеген халықтардың этногенезіне, күрделі де әр алуан мәдени болмысына айрықша әсер етумен бірге, қытайлық әулеттердің, әсіресе Суй және Тан империяларының тарихи даму үдерістеріне терең әрі елеулі ықпал етті. Сондықтан болар, Түрік қағанатының билеуші әулеті – Ашиналардың ататек шежіресі, мұрагерлік тәртібі, қытайлық әулеттермен қарым-қатынасы сияқты мәселелер қытай ғалымдары үшін әрқашан өзекті және қызықты тақырып қатарында. Әсіресе соңғы жылдары Ашина әулетінен шыққан бірқатар тарихи тұлғалардың басына қойылған көктас пен қабіріне көмілген көртастардың табылуы мен ғылыми айналымға енуі осы бағыттағы зерттеуге кең мүмкіндік ашып отыр.