Қазақстанның академиялық тарихын жаңа көзқараспен жүйелеуге бағытталған ауқымды жоба – «Қазақстан тарихы: ежелгі дәуірден бүгінге дейін» атты жеті томдық еңбектің кезекті белесі еңсерілді. Ерлан Қарин төрағалық еткен редакция алқасының Алматыдағы отырысында ХІХ ғасыр мен ХХ ғасырдың басындағы кезеңді қамтитын бесінші томның қолжазбасы бекітіліп, баспаға жол тартты. Бұл – соңғы бірнеше жыл бойы үздіксіз талқыланып, әр отырыста мазмұны тереңдеп, құрылымы қайта қаралып келген ғылыми ізденістің нақты нәтижесі.