Мал бағуды атакәсіп еткен қазақ үшін жайлау дауы жай ғана жер таласы болған жоқ, ол тамырын тереңге жіберген тарих, ұрпақтың ата-баба аманатына деген жауапкершілігі еді. 1924-1927 жылдары Қырғызстанда жарық көріп тұрған «Эркин Тоо» газетінің 1925 жылы 17 сәуірдегі №13 санына «Қарқара кімнің жайлауы?» деген мақаламен Тағай атты автордың мақаласы шықты. Баяндауы шымбайға батардай тік, үні өз жеріне деген сенімді анық аңғартатын сол мақала бүгінгі күннің де кей оқиғасымен үндес. Бірақ бізге, тарихи шындыққа жүгініп, Қарқараның кімге тән екенін тек ашық деректер мен сананы сергек ұстау арқылы анықтау маңызды. Ендеше, «Қарқара кімнің жайлауы?» деген сауалға жауапты тарихтың өзінен іздейік.