Тәуелсіздіктің алғашқы жылдарында Қазақстан аспанында негізінен кеңестік Ан, Ил, Ту және Як ұшақтары ұшса, бүгінде жолаушылар Boeing 787, Boeing 737 MAX, Airbus A321LR тәрізді жаңа буын лайнерлерін күтетін деңгейге жетті. 2025 жылы қазақстандық әуе компаниялары 15,4 миллион жолаушы тасымалдаған. Ал 2026 жылдың алғашқы төрт айында отандық тасымалдаушылардың қызметін 4,6 миллион адам пайдаланған. 2026 жылғы мамырда коммерциялық әуе тасымалдарына тартылған қазақстандық ұшақтардың жалпы саны 111-ге жетті. Бұл көрсеткішке жолаушылар лайнерлерімен бірге чартерлік, іскерлік және арнайы мақсаттағы коммерциялық әуе кемелері де кіреді. Қазіргі таңда Қазақстанның қарапайым жолаушыларға билет сататын негізгі тасымалдаушыларының қатарында Air Astana, FlyArystan, SCAT, Vietjet Qazaqstan, «Оңтүстік аспан», «Жезқазған-Эйр» және «Жетісу» бар.