Қостанай өңірі, Тобыл өзенінің бойы – ежелгі тарих пен археологиялық мұраларға бай аймақ. Солардың бірі – жұртшылық арасында «Тобыл ойшылы» деген атаумен белгілі қола дәуірінің тас мүсіні. Осыдан елу жыл бұрын табылған бұл жәдігер бүгінде Қазақстан археологиясындағы ерекше олжалардың бірі саналады. Ол қола дәуіріндегі адамдардың дүниетанымы, көркемдік талғамы және тас өңдеу өнері туралы маңызды мәлімет береді.