Тамызық: баспасөзбен бүр жарғанАлаш идеясы ұлтты ұйыстырып, елді жаңа сапаға көтерген ұстын ретінде шеттегі қазақтарға да прогрессивті ықпал етті. Әсіресе, жәдиттік негіздегі төте оқу, ұлттық-демократиялық газет-журналдар қиырдағы қазақ санасын рулық түсініктен ұлттық танымға ұлғайтты. Оның бір айғағы, 1912-1913 жылдары Қытай қазақтарынан 15 шақты адам «Айқапты» алдырып, 10 адам «Қазаққа» жазылыпты, кейінірек «Азамат» серіктігіне мүшелікке де еніпті. Міржақып Дулатұлы Алашқа сауын айтып, хат жазғанында сонау қиырдан үн қосып, жеке баспахана сатып алуға 600 сом жіберіпті. Жалпақ жұрттың намысын жани жазылған сол қысқа хатта: «Алаш ұранды қазақ баласы «аһ» десіп қолға алған ісінен біз де құр қалмалық дедік. Алаш туының астына біз де қосылдық! Қараңғы бір шет жерден біздер қосылғанда басқа көзі ашық, көңілі сергек қай қазақ қарап қалар дейміз... Баяғыдан бергі телміргеніміз аз ба? Шөміштен қағылып жүргеніміз бе? Егер қазақтың бір баспаханасы болса, әртүрлі газета, журнал басылып, қазақша мектеп кітаптары көбейіп, көзіміз ашылар еді», – деп ой ұштайды. Осыбір алты сөйлемнен-ақ елдік намысты, рулық түсініктен биік ұлттық танымды түйсіну қиын емес. Алаш туының астына қосылуға үндеген хаттың әр сөзінен өзгемен үзеңгі қағыстырған терезесі тең ел болу арзу-арманы анық менмұндалайды.
Мәдениет
