Жақында Зайсан жаққа жолымыз түсті. Уақытымыздың ыңғайына қарай, тұлпарымыздың тұяғы жеткен жерге дейін киелі мекенді аралап көруге тырыстық. Зайсаннан оңтүстікке қарай беттеп, тау баурайындағы Кеңсай ауылын кесіп өтіп Маңырақтың сайына ене бердік. Жеңіл көлігіміз тауды тіліп өтіп, жыландай ирелеңдеп жатқан тас жолда ор қояндай ұйтқып келеді. 60 шақырымды артқа тастаған соң айналасын тау қоршаған жалпақ жазыққа шыға келдік. Тасбастау дейтін ретті, шағын ауылдан өте бере Шіліктіге іліндік.