Сыр өңірінің Қазалы ауданындағы Әйтеке би кентінде ондаған жылдан бері қордаланған коммуналдық мәселе тұрғындарды әбден титықтатып тұр. Жаздың аптап ыстығында көпқабатты үйлердің кіреберістерін жағымсыз иіс жайлап, жертөлелерге кәріз суы жиналып, санитариялық жағдай күннен-күнге қиындап барады. Тұрғылықты халықтың айтуынша, бұл уақытша пайда болған ақау емес. Түйткіл 36 жылдан бері күрделі жөндеу көрмеген кәріз желілерінің тозуы салдарынан туындауда.